2021-mi atualinnginnermi ulluunerani neqeroorutit

2021 qaammat januaarimi pisortat atualinnginnermi ulluunerani neqeroorutaanni meeqqat 3.787-it allatsissimapput, taakkunannga meeqqat 0-inik ukiullit 194-it, 1-2-nik ukiullit 1.409-t, 3-5-inik ukiullit 2.177-it aammalu meeqqat arfinilinnik amerlanernilluunniit ukiullit 7-it. Taamaasilluni meeqqat 0-5-inik ukiullit tamakkerlutik 76,4 pct.-ii atualinnginnermi ulluunerani neqeroorutini allatsissimapput. Meeqqat allatsissimasut annertussusaasa takutippaat innuttaasut akornanni meeqqat taaneqartunik ukiullit qanoq amerlatigisut atualinnginnermi ulluunerani neqeroorutini allatsissimanersut.

 

Titartagaq 1. Meeqqat atualinnginnermi ulluunerani neqeroorutini allatsissimasut amerlassusaat, kommuni najugaqarfillu malillugit

Najoqqutaq: https://bank.stat.gl/OFNUKN1

 

Amerlassutsimut kisitsinermi meeqqat atualinnginnermi ulluunerani neqeroortini allatsissimasut 0-5-inik ukiullit aammalu 6-inik ukiullit ataasiakkaat tamakkerlugit ilaatinneqarput. Innuttaasuni meeqqat 0-5-inik ukiulinnut naatsorsorneqarput, 6-inik ukiullit ataasiakkaat allatsissimasut ilanngullugit.

 

Pisortat atualinnginnermi ulluunerani neqeroorutaanni sulisut

2021-mi pisortat atualinnginnermi ulluunerani neqeroorutaanni piffissaq tamakkerlugu sulisutut atorfillit 1.150-iusimapput. Atualinnginnermi ulluunerani neqeroorutini sulisut tamakkerlutik arnanik sulisoqakkajunnerupput, 2021-milu arnat piffissaq tamakkerlugu sulisut 1.112-iusimapput angutillu piffissaq tamakkerlugu sulisut 38-usimallutik.

 

Paaqqinnittarfinni sulisut eqimattanut tallimanut agguaassimapput: Pisortanut, perorsaasunut, perorsaanermi ilinniarsimasunut, perorsaasunut ikiortinut aammalu igaffimmi eqqiaanermilu sulisunut. Pisortat aammalu igaffimmi eqqiaanermilu sulisut tapersersuisutut/ikorfartuisutut sulisunik taaneqarsinnaasut sulisut tamakkerlutik 20,3 pct.-iinik annertussuseqarput. Perorsaasut, perorsaasutut ilinniarsimasut aammalu perorsaasunut ikiortit tamarmik meeqqanut paaqqinnittutut sulisunik (meeqqerisutut) naatsorsorneqarput. 2021-mi meeqqerisut 16,3 pct.-ii perorsaasutut sulipput, 29,5 pct.-ii perorsaanermik ilinniarsimasuullutik aammalu 54,2 pct.-ii perorsaasunut ikiortaallutik.

 

Titartagaq 2. 2021-mi meeqqanut paaqqinninnermik sulisut, amerlassusaat pct.-inngorlugillu annertussusaat

Najoqqutaq: https://bank.stat.gl/OFNUKN1

 

Meeqqat meeqqerisumut ataatsimut amerlassusaat

Meeqqat ukiuini agguataarsimasuni assigiinngitsuni sanilliunniarlugit aammalu meeqqat meeqqamut paaqqinnittumut ataatsimut kisinniarlugit meeqqat amerlassusiisa uuttuutaannik kisitsisoqarpoq. Periaatsip immikkoortuani taaguut annertunerusumik nassuiarneqarpoq. Tunngaviusorli tassaavoq meeraaqqerivimmiittoq ataaseq 1,67-inik meeqqat amerlassusaannut uuttuuteqartoq, meeqqerivimmiorlu ataaseq aamma meeqqat amerlassusaannut 1-imik uuttuuteqarluni. 2021-mi nuna tamakkerlugu meeqqat amerlassusiisa uuttuutaat meeqqerisumut ataatsimut agguaqatigiissillugu 5,3-usimavoq. Meeqqat meeqqerisumut ataatsimut amerlassusaannut meeqqat sulisullu akornanni pissutsit apeqqutaasarput, assersuutigalugu amerlassusaannut kisitsit annikippat meeqqat ikinnerunerannik imaluunniit sulisut amerlanerunerannik peqquteqarsinnaavoq.

 

Titartagaq 3. Atualinnginnermi ulluunerani neqeroorutini meeqqerisumut ataatsimut meeqqat amerlassusaat, kommuni najugaqarfillu malillugit

Najoqqutaq: https://bank.stat.gl/OFNUKN1

 

Meeqqanut sulisunullu naatsorsuutit tamakkerlugit

Tabel 1-imi meeqqat amerlassusaat ukiuinut tulleriaarlugit aammalu piffissaq tamakkerlugu sulisut suliaqarfinnut kommuninullu immikkoortiterlugit naatsorsorneqarput. Taamatuttaaq kisitsisaataasivimmi immikkoortortaqarfik, neqeroorutiniittut aammalu najugaq malillugit naatsorsuutit takuneqarsinnaapput.

 

Tabel 1. 2021-mi meeqqat ukiuinut tulleriaarneri aammalu sulisut, kommunit malillugit

	Katillugit	Kommune Kujalleq	Kommuneqarfik Sermersooq	Qeqqata Kommunia	Kommune Qeqertalik	Avannaata Kommunia
Meeqqat ulluunerani neqeroorutiniittut tamakkerlutik	3.787	422	1.477	713	458	717
Meeqqat 0 ukiullit.........................	194	19	68	36	22	49
Meeqqat 1-2-nik ukiullit......................	1.409	152	543	278	173	263
Meeqqat 3-5-nik ukiullit......................	2.177	250	863	396	263	405
Meeqqat 6-inik ukiullit qummullu..............	7	1	3	3	0	0
Pisortat..............................	73	12	23	18	9	13
Perorsaasut............................	148	20	60	25	13	31
Perorsaasutut ilinniarsimasut................	268	36	102	54	29	47
Perorsaasunut ikiortit.......................	492	35	181	106	70	102
Igaffimmi eqqiaanermilu sulisut	158	24	50	16	28	40
Piffissaq tamakkerlugu sulisut.................	1.140	126	416	218	148	232
Meeqqat amerlassusaasa uuttuutaat.........	4.856	536	1.884	922	588	925
Perorsaasut meeqqanut paaqqinninnermi (pct.)..	16,3	21,9	17,5	13,5	11,7	17
Meeqqat meeqqerisumut ataatsimut amerlassusaat	5,3	5,9	5,5	5,0	5,3	5,2
Meeqqat 0-5-inut allatsissimasut amerlassusaat (pct.)	76,4	75,2	74,3	85,4	79,4	71,8
Ulluunerani neqeroorutiniittut..................	156	17	47	33	21	38

Najoqqutaq: https://bank.stat.gl/OFNUKN1